1290 (c) - Angoumois - Gourville (16) - Foires - Droits perçus par le seigneur

Les droiz des feyres de Gorville

SACHENT tous que les droiz de foires monsegneur de Gourville hons esté acoustumés à lever en la manière qui s’ensuit :
 Premièrement tout cil qui apporte avez de pes, si comme pevre, gingembre, soye, cendeu ou autres choses, payent pour,droit de foyre 1 denier à Monsegneur.
 Item, si avoer de pes n’est aportez, si comme coeffes, centures et myhans, payet 1 denier s’il tient estaud, et s’il est coliers, il ne doit riens.
 Item tout marchant aportans draps de Iane ou de lange sans ovre faire paiet 1 denier, et cil qui achapte payes maille s’il est à pié, si à cheval, 1 denier, excepté ceaus de la chatelanie qui ne payent riens ; et si l’en sera ovre faicte l’en n’en doit rien.
 Item tout marchant aportans coherain, si comme sorlers, botes, corloen ou basane, payent de renzcon 1 denier, excepté ceaus de la chatalenie qui ne payent riens.
 Item tout cil qui aportet charbe ou lin à vendre payent 1 denier de renzcon, et cil qui achapte payet maille s’il est à pié, si à cheval, 1 denier, excepté ceaus de la chastelanie qui ne payent riens.
 Item tout bouchier qui aporte char cruhe à vendre payet checun 1 denier, ceaux de la chatelanie excepté.
 Item de boisseau de tout blé vendu Monsegneur prent 1 jaloent et 2 mains de minage, ou soit dehors la chastelanie ou dedans, et en meisme manière de checun saunier sau vendant.
 Item tout panetyer payent 1 denier, ceaus de la chastelanie excepté.
 Item tout tavernier, tant de la chatelenie que dehors, tant en la fere que en la ville, payent 1 denier ; item, s’il est hors de la chatelanie, payet 2 deniers à ceaus qui tiennent les mesures pour Monsegneur.
 Item de tous ceaus qui aportent somme de paniers 1 panier ; de checune somme de cruveaus n’est riens payé.
 Item de toutes sommes d’oules, toupins, mesures et autres vaysseaulx de terre, de checune somme un vaysseau, excepte que li colier ne devent riens.
 Item de tout ceaus qui aportent fruchaille en sommes ou en paniers ou en quelque autre manière, poy ou prou, 1 denier ou la value du fruit, nul excepté.
 Item de checune somme de escuheles, 1 denier.
 Item de tous ceaus de la chatelanie ou dehors ap-portans aygruns, ayls et oignons, poi ou prou, 1 denier, ou tant de celes danrées com verra que à fere sera au lentour selon comme checuns aura.
 Item si bous, vache, moutons, oylle, bocx, chèvre ou pors est venduz, ly venderes doit pour checun 1 denier et l’achapteres autant, ceaus de la chastellanie, nobles hommes et personnes privilégiées exceptés.
 Item si jumens ou roncins est venduz, li venderes doit 2 deniers et li achapteres autant, et si li jumens ou li roncins n’est ferrez, li venderes doit 2 deniers et li achapteres autant, ceaus de la chatellanie, nobles hommes et personnes privilégiées exceptés.
 Item si ane ou anesse ferrée ou non ferrée est vendue, ly achapteres doit 1 denier, et li venderes autant, ceaus de la chatellanie, nobles hommes et personnes privilégiées exceptés.
 Item si peaus de bouf ou de vache soient vendues, li venderes doit pour checune 1 denier et li achapteres autant, ceaus de la chastelanie exceptés.
 Item de.dozene de peaus de motons, d’oyelles, de bocx, de chèvres vendue, 3 mailles et au grant et au vaillant si plus ou meins en y ha, ceaus de la chatelanie exceptés.
 Item tapiz, lane tonte, ovre de forge, cordier, cotelier, orfàivre, verier, pichier, cerclier, oysil et charcuyte, ne payent riens.
 Item est assavoir que Monsegneur de Marcillac ne prent riens on dictes feres fors tant seulement le péage sur ceaus qui passent la Charante ; sus autres quelque part qu’ilz ayllent, ledit sires ne prent riens.