1573 Charles IX annonce des moyens renforcés pour la prise de La Rochelle

Mandement du Roy par lequel est enjoint à tous chefs, membres, hommes d’armes, & autres de ses ordonnances, qu’ils aient à se rendre dans le xxe de Juin prochain en son Camp devant la Rochelle, montez, armez & equippez ainsi qu’il est requis, pour faire monstre en armes [1], & courir sus aux Rebelles.

A Paris

De l’imprimerie de Federic Morel Imprimeur ordinaire du Roy.

Avec Privilege dudict Seigneur

Sommaire du Privilege

Par lettres patentes du Roy, donnees à Paris le quatriémz jour de Mars, mil cinq cents soixante quinze, signees sur le reply, Par le Roy, Monsieur le grand Aumosnier present, DE-NEUFVILLE, & seellees du grand seel dudit Seigneur, en cire jaune, sur double queuë : verifiees tant en la Cour de Parlement, Chambre des Comptes, des Aides, que au Chastellet de Paris : Il est permis à Frederic Morel son Imprimeur ordinaire, d’imprimer, ou de faire imprimer, vendre & debiter tous Edicts, Ordonnances, Mandements, & Lettres patentes, sans qu’autres Libraires & Imprimeurs les puissent imprimer ne faire imprimer, si ce n’est du vouloir & consentement dudict Morel : sur les peines contenues esdictes Lettres. En oultre a ledict Seigneur voulu, qu’apposant par ledict Morel un extraict sommaire de ses Lettres, au commancement ou à la fin de chascun des Livres qu’il imprimera, elles soient tenues pour suffisamment notifiees & venues à la cognoissance particuliere de tous ceulx qu’il appartiendra, sans qu’ils en puissent pretendre cause d’ignorance.

De par le Roy

Nostre amé & feal, d’autant que les Compaignies de nos Ordonnances qui avoient esté destinees pour se trouver en nostre Camp & Armée devant la Rochelle, pres nostre tres-cher et tres amé Frere le Duc d’Anjou & de Bourbonnois, nostre Lieutenant general, representant nostre personne par tout nostre Royaume, & païs de nostre obeissance, y ont ia longuement sejourné : estant besoing, ainfi qu’a cogneu nostredict Frere, de leur donner quelque congé pour s’aller rafreschir, & ce pendant renforcer nostre ditte armee d’autre bon nombre de Compaignies de nosdittes ordonnances, seIon que nostredit Frere a advisé, & les y faire aller & rendre dans le xx du mois de Juin prochain. C’est à scavoir, les Compaignies de soixante lances, sous la charge & conduitte de nos treschers & tresamez Cousins les Prince de Condé, & Prince Dauphin : celles de trente lances, sous la charge de nos Cousins, le Grand Prieur de France, les Sieurs de Meru & de Thoré, des Sieurs de Chaulne, Comte
de Beyne, d’Estree, de Rubempré, de Clermont Tallart, de Chavigny, de la Chapelle aux Ursins, Grand Prieur de Champaigne, de Bouchavannes, Viconte de Thurenne, & de Saultrey, qui a vingt lances tirées de la Compaignie de nostre trescher Frere le Roy de Navarre. Et quant à celles de nostredit Frere le Roy de Navarre, & de nostre trescher & amé Cousin le Marquis de Villars, Admiral de France, nostre Lieutenant general au gouvernement de Guyenne : des Sieurs de la Vallette, de Humieres, dom Francisque d’Est, de S. Suplice, de Bellegarde, & de Gohas, Nous voulons quelles se rendent aussi le plus tost & diligemment qu’il se pourra, près nostredit Cousin l’Admiral, à fin qu’avec icelles, & autres forces que luy avons ordonnées, il puisse courir sus à ceulx qui font contenance de s’eslever contre nous audit pais de Guyenne, & remettre en nostre obeïssance les villes occupées par nos Rebelles. A ces causes nous vous mandons & ordonnons par ces presentes, que incontinent icelles receuës, vous faictes publier & proclamer de par nous, en la maniere accoustumee, par tous les lieux endroits de vos pouvoirs & jurisdictions : Que tous, soient chefs, membres, hommes d’armes, & autres de compaignies ordonnées, pour (ainsi que dict est) aller à la Rochelle, sur tant qu’ils aiment leur honneur, & le bien de nostre service, aient à se rendre dans le xx de Juin prochain precisément, si plus tost ils ne peuvent, en nostredit camp & armee, montez, armez, & equippez ainsi qu’il est requis, & sont tenus par nos ordonnances, pour illec faire monstre en armes, & recevoir payement pour un quartier [2], qui leur sera déclaré en pleine monstre : & les autres Compaignies près nostredit Cousin l’Admiral de Villars, au xxv jour de juin aussi prochainement venant, pour semblablement faire monstre en armes : & sur tout, que lesdictes compagnies soient en estat, & en l’equippaige requis pour faire laditte monstre en armes. Voulans que ceulx qui y defailliront soient, & les déclarons desapresent, privez & cassez de nosdictes ordonnances, sans qu’ils puissent cy apres estre relevez ny remis en icelles. Et à ce ne faittes faulte, & à nous certifier & nostredit Frere, du devoir & de la diligence qu’aurez faitte en cest endroit. Car tel est nostre plaisir.

Donné à Fontainebleau,le xi jour de May, 1573
.
Signé, CHARLES.

Et au dessous, DE-NEUFVILLE.

Leu & publié à son de trompe & cry public par les carrefours de ceste ville & faulx-bourgs de Paris, lieux & places accoustumez, à faire cris & publications, par moy Pasquier Rossignol Crieur juré du Roy nostre Sire és ville, prevosté, & viconté de Paris, accompaigne de Philippes Noiret, commis de Michel Noiret Trompette juré dudit Seigneur esdits lieux, & de deux autres Trompettes, le xiiii jour de May, 1573.

ROSSIGNOL.